Servisio di Atmishon ku kambio temporal den manera di traha sita

Servisio di Atmishon ku kambio temporal den manera di traha sita

Willemstad – Servisio di Atmishon ta informá kambio den e manera pa traha sita pa tuma pèrmit di estadia (stèmpel den pasport). Entrante djaweps 25 di sèptèmber 2025 por traha sita únikamente via di telefòn òf email i no via website www.immigrationcur.org.

Ora ku un persona entregá un petishon pa un pèrmit di estadia òf deklarashon i el a risibí un desishon positivo riba esaki, e mester traha un sita pa asina por tuma su pèrmit/deklarashon. Aktualmente (te ku próksimo aviso) no por traha sita via di website www.immigrationcur.org. Por traha sita via numbernan di telefòn 733-2080, 733-2081 i 733-2083 di djaluna pa djaweps di 8:00 am pa 12:00 pm. Tene na kuenta ku ta risibí hopi yamada diariamente, ku tin momentu por difikultá ku no ta haña kontakto mesora ku nos.

Tambe por manda un e-mail na info@immigrationcur.org pa pidi un sita pa tuma e pèrmit. Na momentu ku manda un e-mail mester menshoná, nomber, number di petishon i number di telefòn di persona ku tin mester di e sita pa tuma su pèrmit. Si ta trata di un famia ku mester tuma nan pèrmit/deklarashon, mester traha sita pa kada miembro di famia apart. Na momentu ku no por akudí na e sita, por fabor di kanselá esaki na tempu. Por hasi esaki via di e number di telefòn 733-2080, 733-2081 i 733-2083 òf e-mail info@immigrationcur.org.

Ora ku presentá riba dia di e sita mester tin tur dokumentu ku ta menshoná den e karta di desishon. E dokumentunan aki mester ta original. Sin e dokumentonan nesesario, no por risibí e stèmpel den pasport i lo mester traha un sita nobo. Si ta trata di un promé pèrmit kaminda mester paga deposito, mester tin e komprobante  di pago di Servisio di Impuesto. Si tin yu ku tin 12 aña òf mas, e yu(nan) tambe mester tei presente na e sita.

Servisio di Atmishon ta pidi pa tuma bon nota di esakinan. Alabes ta gradisí su klientenan pa e komprenshon i ta sigui traha pa brinda e servisio kustumbrá.